Blog Archives

وقفة لأعضاء اولتراس اهلاوى أمام محطة مترو حلوان

وقفة لأعضاء اولتراس اهلاوى أمام محطة مترو حلوان - للمزيد يمكنكم الضغط علي الصورة

وقفة لأعضاء اولتراس اهلاوى أمام محطة مترو حلوان – للمزيد يمكنكم الضغط علي الصورة

IMG_0339

نظم أعضاء رابطة اولتراس أهلاوى سكشن حلوان وقفة أمام محطة مترو حلوان أمس الجمعة وذلك مع إقتراب موعد جلسة  المحاكمة للمتهمين في قضية مذبحة بورسعيد والتى راح ضحيتها 74 من مشجعي الاهلي, ورفع المشاركون بالوقفة لافتات كتبوا عليها ( محاسبة الجاني مش النهاية وراء كل جانى مدبر للحكاية, لو حق اخواتنا مجاش يا حكومة متلوموناش,…. ) كما سادت حالة من التعاطف من المارة مع الشباب وسط تعاون من قوات الشرطة المكلفة بتأمين محيط المحطة.

يذكر أن اعضاء رابطة اولتراس اهلاوى قد قاموا بتنظيم العديد من المسيرات والوقفات الاحتجاجية إعتراضا علي ما أسموه تباطؤ في المحاكمة وتواطؤ من النظام الحاكم, ذلك بالإضافة إلي قيامهم بالاعتصام أمام مجلس الشعب المصرى في مارس الماضي.
جدير بالذكر أن موعد جلسة المحاكمة مقرر في 26 يناير القادم وسط ترقب من أعضاء رابطة مشجعي الاهلي وأهالي شهداء المذبحة مطالبين بالقصاص العادل لدماء الشهداء

Advertisements

وقفة تضامنية مع اهالى القرصاية والصحفى محمد صبرى

صور للوقفة امس امام دار القضاء العالي

صورة من الوقفة .. للمزيد يمكنكم الضغط علي الصورة

 

نظمت مجموعة “لا للمحاكمات العسكرية للمدنيين”  في السادسة من مساء أمس وقفة تضامنية أمام دار القضاء العالي بالقاهرة تضامنا مع أهالي جزيرة القرصاية الذين تتم محاكمتهم أمام القضاء العسكري, منددين بإحالة مدنيين للمحاكمات العسكرية وهو ما اعتبروه ردة للخلف مما يذكرهم بمنهجية النظام البائد

جدير بالذكر أن مشكلة جزيرة القرصاية ترجع إلي عام 2007  بقرار من مجلس الوزراء بإخلاء الجزيرة .. واستمر الجدل قائما إلي أن حكمت محكمة القضاء الادارى بعدم إخلاء الجزيرة وذلك في فبراير 2010  “نص الحكم”
إلا أن أهالي الجزيرة فوجئوا بهجوم قوات الجيش في 18 نوفمبر 2012 علي الجزيرة لإخلائها من الاهالي وهو ما راح ضحيته المواطن محمد عبدالموجود ويحاكم علي أثره حوالى 26 من اهالي الجزيرة أمام القضاء العسكرى.

كما رفع المشاركين بالوقفة لافتات تندد  بإعتقال الصحفي محمد صبرى والذى يحاكم أيضا أمام القضاء العسكرى بتهمة تصوير منشآت عسكرية وذلك أثناءقيامه بعمل تقرير صحفي عن قراروزير الدفاع الاخير بحظر تملك الاراضي علي الشريط الحدودى الشرقى بسيناء.

وردد المشاركون العديد من الهتافات منها “ادى مفهومهم للحرية .. المحاكم العسكرية”  .. “محمد صبرى يا اخانا .. كيف العتمة في الزنزانة” ..  “يسقط يسقط حكم العسكر / المرشد”

شهادتى عما حدث حتي الساعة 9 مساء في محيط #الاتحادية

وصلت عند تقاطع الميرغني مع الخليفة المأمون حوالي الساعة 6م وكان العدد حوالي 3000 شخص متجمعين بيهتفوا ضد مرسي والاخوان 
فضلنا حوالي ربع ساعة والناس قررت تتجه للاتحادية … اول مجموعة دخلت الشارع بعد حوالي 300م فوجئنا انهم بيرجعوا ووراهم مجموعة من الاخوان والسلفيين بيحدفوا طوب … بدأنا نرجع لانهم كانوا بيضربوا طوب بكثافة … بعد حوالي 5 دقائق بدأ صوت ضرب نار .. ووقع اول إصابات بالخرطوش 
وبعد كده الاخوان ضربوا قنابل غاز مسيل للدموع حوالي 5 قنابل … والناس بدأو يرجعوا تاني … شوفت واحد وشه بينزف دم وعرفت إنه اتصاب بخرطوش حاولنا ندور علي اى صيدلية لكن كل الصيدليات قافلة … وانا بحاول اوصله للمستشفي الميداني الاخوان هجموا علي الناس والمستشفي اتفضت 
اخدته وروحنا مستشفي القاهرة التخصصي علي بعد حوالي 700م من الاشتباكات … دخلت جوه وهو كان مصاب بخرطوش في عينه وفي رجله 
اول ما دخلنا الاستتقبال كان فيه واحد بيصرخ جامد جدا وشوفت جسمه كله مليان بلي خرطوش … وقفت شوية وبعدين رجعت تاني 
اول ما رجعت كان الاخوان هجموا علي ميدان روكسي وعملوا حواجز … وكان ضرب الغاز والمولوتوف والخرطوش شغال … لكن بعدها اتضرب رصاص من سلاح آلي “الصوت واضح علشان متسألوش عرفت منين” 
المهم … كر وفر بيننا وبينهم وتراشق بالطوب لكن مره واحده هما رجعوا جري واحنا تقدمنا عليهم ولقينا الامن المركزى اخد صف بعد ما هما رجعوا 
فضل تراشق الحجارة شغال وناس من ناحيتنا فضلوا يقولوا للناس تبطل حدف طوب … جه ظابط وشه مليان دم ناحيتنا وعرفت إنه اتضرب من طرف الاخوان … اخدناه وصلناه للاسعاف 
بعد شوية الشرطة ضربت غاز ناحيتنا ورجعنا … ومشيت 
النهاية … الاخوان نزلوا ميليشياتهم بغاز مسيل “بتاع الداخلية” وخرطوش ورصاص حي علشان يضربوا في المعارضين 
الاخوان هما اللي عملوا موقعة الجمل وده بقي شئ بيتأكد كل يوم 
محمد مرسي هو زعيم عصابة إسمها الاخوان ويجب محاكمته هو وكل قيادات جماعته 
الداخلية سهلت الاعتصام امبارح علشان المخط يتنفذ .. زى ما حصل النهاردة 
يسقط كل كلاب الاخوان … يسقط كل عصابة الاخوان 
نورمان عماد
5 ديسمبر 2012

اتكسفوا … عن التحرش والمتحرشين

اتكسفوا .. تسجيلى عن التحرش فى مصر ونظرة من عدة جوانب للموضوع سياسيا

مونتاج : مارك سمير

تصوير وإخراج : نورمان عماد

مستحيل اشارك فى اختيار حد يقتل الثورة

فى كل الحالات انا مقاطع المهزلة اللى بتحصل

مستحيل انتخب واحد كان فى يوم من رجالة مبارك …. ومستحيل انتخب واحد سكت لما قال مهدى عاكف “طظ فى مصر” وهو من جماعته

مستحيل انتخب واحد بيقول لو حد اعترض عليا ف العباسية كانت قرصة ودن بالنسبة للى هايحصل … وبرضوا مستحيل انتخب واحد جماعته هاتضربنا بالجزمة لو عارضناهم

مستحيل انتخب واحد بينزل مؤتمراته بالبلطجية … وبرضوا مستحيل انتخب واحد ينزلّنا ميليشيات جماعته يقفوا قصادنا لو عارضناه زى ما حصل فى مجلس الشعب

مستحيل انتخب واحد بيقول على الثورة حركة … ومستحيل انتخب واحد جماعته لما وصلوا للبرلمان قالوا علينا عايزين نقتحم الداخليه “لما كنا بنكمل ثورتنا” وقالوا ان الداخلية صادقة ومفيش خرطوش

مستحيل انتخب واحد قتل اخواتنا .. ومستحيل انتخب التانى اللى جماعته سابتنا فى محمد محمود علشان كراسى البرلمان وقالوا علينا عملاء ومأجورين عايزين نأجل الانتخابات

مستحيل انتخب واحد جى عن طريق مجلس عسكرى للأنتخابات … ومستحيل برضوا انتخب واحد راح هتف هو وجماعته للمشير

مستحيل انتخب واحد كان بعد مرور سنة على الثورة بيفكر ازاى يجهضها … ومستحيل انتخب التانى اللى جماعته عذبوا الشباب فى الميدان لما هتفنا ضدهم لما كانوا نازلين يحتفلوا واتخانقوا مع اللى بيهتف ضد العسكر

فى النهاية مستحيل انتخب واحد من اتنين بيشتروا الاصوات وبيزوروا فى الانتخابات

يسقط حكم المرشد ويسقط حكم العسكر

عدو عدوى ليس صديقى

حقيقى منبهر من الاخوان … ازاى مصدقين نفسهم اوى كده انهم اكتر ناس بتحب البلد واكتر ناس بتتحارب من كل الجهات ..
لو نسيتوا اللى عملتوه فى الثوار وباقى القوى السياسية ممكن نفكركم …:
خلينا نستنى على حكومة الجنزورى … شكرا للمجلس العسكرى … اللى فى التحرير بلطجية .. اللى فى محمد محمود بلطجية مأجورين يريدون تأجيل الانتخابات … اللى فى مجلس الوزراء عملاء بيقبضوا بالدولار .. واللى تبع البرادعى دول عملاء وخونة … اللى فى التحرير عايزين يقسموا مصر …. دى موجز للى اتقال من الاخوان …
وبعد ما الاخوان اتحالفوا مع العسكر وأيدوا المحاكمات العسكرية للثوار .. وأيدوا سحل البنات والشباب فى الشوارع .. وبعد ما خاضوا فى عرض بنات مصر .. وبعد ما خونوا الثوار .. عايزين يقلبوا على المجلس العسكرى بالمرة وياخدوا الدستور يعملوه وييجى رئيس منهم .. وحكومة منهم … وطظ فى الشعب طبعا .. أو طظ فى مصر زى ما قال المرشد العام السابق ..
بعد ما كانوا عايزين يعملوا قانون “تنظيم” “تجريم” تظاهر … جايين يطلبوا دعم
اسف جدا كان ف عدو عدوى ليس صديقى …
يسقط حكم العسكر ويسقط كل من هم ضد الحقوق والحريات .. كان نفسى انزل مظاهرات ضد المجلس العسكرى ودعما لقوى مدنية  .. لكن قانون تجريم التظاهر اللى عايزين تعملوه مانعنى

فى 25 يناير .. كان نفسى تكونوا معانا

اكيد النهارده يوم مهم جدا فى تاريخنا لأنه 25 … اليوم ده السنه اللى فاتت مكنتش متخيل اصلا ان حد هاينزل وقولت محدش بيفكر فى غيره .. يبقى حد هايفكر فى البلد؟ والحمدلله انى طلعت غلطان جدا جدا ولقيت اشجع واطهر المصريين نزلوا ومش بس فكروا فى غيرهم … دول كمان دفعوا حياتهم تمن لحريتنا وبعد ما مبارك تنحى قولنا خلصنا بس لسه لينا مطالب لازم تتنفز, لكن الحقيقة ان مبارك ساب لينا 19 مبارك تانيين يقتلونا ويسحلونا ويخلونا نفقد اعز اصحابنا واهلنا, وعانينا كتير اوى من اللى بيحصل فى البلد على ايد العسكر, واللى للأسف الجيش المصرى بقى طرف فيه …
فقدت فى حكم العسكر مينا دانيال فى احداث ماسبيرو .. واللى قتله هو الجيش المصرى وشاركه الاعلام , وفقدت بعده احمد منصور فى احداث مجلس الوزراء وبرضوا اللى قتله هو الجيش المصرى .. ومن كام يوم استشهد محمد جمال “مصرى” اللى اصلا مكنتش اعرف اسمه لكنى كنت بشوفه دايما ومعرفتش اسمه غير لما مات

غيرهم كتييييير اوى بحس انى مديون ليهم وانى لازم اجيب حقهم او على الاقل منساش فضلهم فى الثورة …. كان نفسهم يعيشوا لما يشوفوا البلد دى احسن .. كانوا نفسهم يغيروها للأحسن فعلا كان نفسنا تكونوا معانا لكن “نحتفل بالثورة” … لكن للأسف نازلين بكره علشان نطالب بنفس اللى انتوا طالبتوا بيه
المجد للشهداء

%d bloggers like this: