Blog Archives

زيارتنا لعلاء فى السجن النهارده

النهارده عملنا مسيرة من ميدان طلعت حرب لغاية باب الخلق … علشان نمسى على علاء عبدالفتاح.
بس بصراحه كان عدد مشرف جدا … المسيرة انا مقدرش احدد عددها لأنى مكنتش شايف بدايتها ولا نهايتها, المهم ان المسيرة دى مكانتش علشان علاء وبس … كانت علشان كل المحاكمين عسكريا وكان معانا ناس معروفة ونشطاء وناس عاديين عرفوا الموضوع فانضموا لينا … دوا غير الناس اللى اخدوا مننا استيكرات علشان يلزقوها على عربياتهم.
واحنا ماشيين فى الشارع … وبالصدفة قابلنا 3 عربيات امن مركزى … طبعا الناس مصدقوا كل اللى معاه استيكر ماستخسرش فى الداخليه … وكمان حبوا يوجبوا معاهم وراحوا كاتبينلهم بالاسبراى “الداخلية بلطجية” .. “يسقط حكم العسكر” …
كملنا شويه ودخلنا عند مبنى تابع للشرطة العسكرية … حبايب الملايين … الناس مستخسروض فى الشرطة العسكرية اى حاجه بقى … جرافيتى تلاقى .. كتابة بالاسبراى تلاقى … استيكرات تلاقى … بس فعلا الناس اثبتوا انهم بيعلموا العالم درس فى السلمية … مفيش واحد اعتدى على مجند امن ولا ظابط ولا اتعرض لأى حد … بمعنى اصح مفيش خناقة واحده حصلت ولا مع جيش ولا شرطة.
وطبعا المنظر المشرف ميكملش من غير الكردون اللى بيتعمل فى المسيرات … والنهارده شوفت حاجه جميله اوى .. ان الناس بيعتذروا لأصحاب العربيات اللى ماشيه عن الزحمه اللى حاصله … والناس بقت تاخد مننا استيكرات وتلزقها على العربيات بتاعتها …. وشوفنا تضامن من الناس كبير

المهم وصلنا السجن وحيينا الداخلية وهتفنا بهتافات كتيره اوى … لكن بصراحة انا مبتمزجش غير بهتافات عم “كمال خليل” النهارده شوفته وهو بيهتف كنت محتار هو بيبكى ولا بيضحك … كنت شايف الضحكة فى وشه لكن برضوا كنت حاسس بحسرته على اللى بيحصل … المهم عم كمال هتف ومزجنى انا شخصيا والشباب طبعا متوصيين بالهتافات ضد “حبيبهم” المجلس السنكرى … المهم قعدت انا شويه وابتديت اتحرك علشان اروح اركب وكانوا الناس لسه شغالين فى الهتافات …
لحد كده وخلصت حكايتى مع النشطاء والمتظاهرين … روحت بقى علشان اركب … طبعا لازم تسمع فى الشوارع القريبه من المظاهرة سب وشتيمة فى الثورة والثوار … رديت على شوية ناس وفهمتهم اللى احنا عايزينه ونفضت للباقى اللى هما “المواطنين الشرفاء” اللى بيتفرجوا على زبايضر وبيسمعوا كلام المجلس…
المهم ركبت الميكروباص ولقيت واحد قاعد ورا خالص ابتدى يتكلم عن الوقفة .. ولقيته بيقول ان دول عايزين يدخلوا يخرجوا واحد مسجون … طبعا لا اراديا لفيتله وشرحتله الموضوع وسبب الوقفة ومن حسن حظى لقيت واحد مقتنع بموضوع “لا للمحاكمات العسكرية للمدنيين” وده خفف عنى الجهد شويه … المهم شرحت للراجل وطبعا الناس اللى قاعدين ابتدوا يتجادلوا … خلصت عليهم واحد ورا التانى فى الكلام لغاية ما نزلت والناس كلها معاها استيكرات “لا للمحاكمات العسكرية” وبصراحة دى اول مره اعمل انتصار جامد اوى كده ….
فى النهاية … انا متفائل جدا بالحالة اللى موجودة فى الناس … لأن دلوقتى فيه ناس كتير عايزين يفهموا … لأنهم تايهين فى التلفيزيونات وعايزين حد يكلمهم … وده دورنا احنا دلوقتى اننا نكلم الناس البسيطة ونعرفهم …

Advertisements
%d bloggers like this: