Blog Archives

وابقى سلملى على التضامن واللى بيتضامنوا

بعد ما يتقبض على واحد من النشطاء او المدونين بتطلع حملة (كلنا…. , أو الحرية لـ…. ) وطبعا اللى بيدعوا للحملة دى او الصفحات دى المتضامنين مع صاحب القضية … والغريبة ان كان من شهر واحد تانى اتقبض عليه بنفس الطريقة واتحاكم عسكريا برضوا … ومفيش حد من الناس دى عبره,
يعنى مثلا احنا من شهر “فبراير” وركزوا على التواريخ … كان فيه عمرو البحيرى ومجموعة معاه اتقبض عليهم واتحاكموا عسكريا وكانت تهمة عمرو بالتحديد انه اعتدى على مجند خدمة عامه والسير اثناء حظر التجول, سيبكم من حكاية التهم دى لأننا عارفين انهم بيكيفولنا اى تهمة وخلاص, لكن وقتها مجموعة بسيطة من النشطاء هما اللى اتكلموا عن عمرو البحيرى والناس اللى اتقبض عليهم وكان في الناحية التانيه هجوم شديد عليهم ومحدش راضى يسمعلهم.
وبعدها اعتقالات فى مارس واللى كلنا عارفين اللى حصل فيها … لكن فى نهاية مارس كان مايكل نبيل اتقبض عليه واخد حكم … وطبعا لأن مايكل ليه حالة خاصة فكان حتى النشطاء خايفين يتضامنوا معاه “احسن يتاخد عنهم فكره وحشه” باستثناء برضوا نفس المجموعة اللى كانت ثابته على موقفها من الاول … ومرت الايام والشهور … وبقى جوه السجن دلوقتى حوالى 15000 مصرى اتحاكموا محاكمات عسكرية واخر “اشهر” القضايا هى قضية علاء عبدالفتاح, ومحدش يقدر يتكلم عن حجم التضامن مع علاء عبدالفتاح بسبب اولا انه من اكتر المناهضين للمحاكمات العسكرية وهو من اوائل المدونين وحاجات كتير كده تخلى الناس تتضامن معاه …. لكن فيه حاجه مهمة جدا بتساعد فى قضية علاء … وهى ان ناس كتير ابتدت تفوق لنفسها وتشوف فعلا ان المحاكمات العسكرية للمدنيين هى انتهاك لحقوقنا.
من اشكال التضامن مع علاء .. هى حملة اضراب عن الطعام ابتدت بعد ما اعلنت د/ليلى سويف والدة علاء اضرابها عن الطعام … وبعد كده ابتدى ناس تانيين يعلنوا اضرابهم.
لكن انا هنا بيستوقفنى مواقف كتير اوى … منها ان المتضامنين نفسهم فيهم حاجه غريبه … تلاقى واحد كاتبلك ( بالرغم من انى مختلف مع ….. فى حاجات كتير , لكن انا متضامن معاه) … وواحد تانى يقولك (بالرغم من انه شخصية …. لكن ميستاهلش يتحاكم عسكريا) … على اساس ان الناس محتاجين يعرفوا الباقيين انهم مختلفين مع السجين ده لكنهم .. ومن كرم اخلاقهم بيتضامنوا معاه.
اللى بيتضامن فهو بيتضامن مع قضية مش مع شخص … لأننا لما سكتنا على 15000 واحد بقى اصحابنا كمان منهم … ومش بعيد ابدا احنا كمان نبقى زيهم … وده لأننا كنا خايبين من الاول ومعرفناش نفكر صح.
وبالنسبة للناس اللى بتدخل تشتم فى اى حد من الاسرى لدى العسكر … وبيقولوا انه عايز كسر رقبته ,او عايز الحرق …. الخ من الكلام التافه ده … ياريت تفوقوا لأنهم فى يوم من الايام هاتندموا على كل موقف سلبى اخدتوه وكل حالة شخصنتوها ورفضتم تتعاملوا باحترام لحقوق الانسان.
بالامس كان الوقت غير مناسب … غدا سيكون القوت قد فات

Advertisements
%d bloggers like this: