العمال والثورة

النهارده كان فيه زيارة للدكتور محمد البرادعى لحلوان فى دار الخدمات النقابيه تم تنظيم ندوه للعمال, البرادعى اتكلم بكل بساطه وتواضع مع العمال, حاول يعرف مشاكلهم وايه اللى هما عايزينه, أكد فى لقائه أن العمال كانوا عامل مهم فى نجاح الثورة, وأن السياسيين اللى متضايقين من اضرابات العمال دلوقتى كانوا الاول محتاجين ان العمال يعملوا اضراب, لكن لما مبارك سقط بقى بالنسبالهم العمال هم تقيل, وطبعا العمال ماسكتوش, كل اللى عايز يقول حاجه راح مفتوح على اخره جاب القديم والجديد من فساد فى النقابات لفساد فى الادراة والاقسام والتأمينات وكل حاجه وحشه قالوها, وطبعا مانسيوش يتكلموا عن مرشحين الرئاسة اللى محدش شاف وشهم بين العمال, والكلام كتر والمواضيع اتفتحت اكتر وسبحان الله الراجل اللى مش عاجب كتير من الناس بحجة انه ميعرفش حاجه عن مصر فتح صدره للعمال ومزهقش من كتر الكلام ولا كتر الشكاوى.
موضوعى بقى مش البرادعى انه نزل يتكلم مع العمال, ده الطبيعى انه يحصل من أى واحد محترم , لكن انا عايز اتكلم بقى عن باقى السياسيين اللى عاملين نفسهم مفيش زيهم, يقعد يكلمك كأنه أحسن خبير فى كل حاجه لكن لما ييجى وقت الفعل ماتلاقيش حد بيتحرك, يقعدوا يقولوا المجلس العسكرى بيغلط .. وتلاقيهم هما أول ناس بيجروا ورا المجلس العسكرى.
يقولوا عمر سليمان هو دراع مبارك … وتلاقيهم هما اللى بيجروا ورا عمر سليمان فى الاجتماعات.
يقعدوا يقولوا حقوق العمال والفقراء, ولما يعملوا اجتماعات يقعدوا يتفقوا على حاجات تانيه خالص خاصه بمصالحهم السياسية والشخصية .. مين هايمسك ايه ومين هايترشح فين .. ومين هايضحك على الشعب.
ويا سلام بقى لما تلاقى شوية عمال عاملين اعتصام او اضراب .. طبعا بيبدلوا , يعنى الورديه تشتغل فى وقتها والورديه التانيه هى اللى تعتصم … المهم تلاقى السياسيين يطلعوا يقولوا “ده مش وقت اعتصامات ولا اضرابات فئويه” مع ان العمال واضراباتهم هى اللى شغاله من 2006 والمظاهرة اللى اتقلبت ثوره يادوب مكملتش سنه وقامت اصلا علشان حقوق كل المصريين … مش علشان السياسيين يسيطروا على البلد والعمال يتضربوا بالجزم.
اما بقى مرشحين الرئاسة ف بالنسبالهم العمال دول اخر ورقه يلعبوا عليها يقعدوا يلفوا ويدوروا وكل برنامجهم قائم على برامج التوك شو واجتماعات المجلس العسكرى او اجتماعاتهم ببعض … يا سبحان الله كأننا نسخنا من مبارك شوية مرشحين صغيرين ناسيين ان اللى مشى مبارك هما الناس اللى مش معبرينهم دول, وهما العمال دول اول ناس طلعوا يهتفوا ضد مبارك وقت ما كان مرشحين الرئاسة دول بيجاملوا فيه او مستخبيين فى الجحور.
فعلا انا مستغرب على السياسيين اللى مفهموش ان الشعب ده هو الاولى وهو اللى ممكن يمشيهم مهما عملوا … وإن الكدب والكلام المعسول مينفعش بعد ثورة شعب عمال وفلاحين وطلبه و …الخ
وفى النهايه انا بس عايز اقول حاجه … ناس كتير عايشين فى البلد مش حاسين باللى فيها ولا بأهلها … لكن فيه ناس كانوا عايشين بره ونفسهم يخدموا مصر واهل مصر بروحهم
واللى حصل خير دليل

About Norman Halim

Human Rights activist, Bolgger, Short Videos producer and student in Faculty of Engineering, Architecture Department I love travel, music and facebook Hate violence and dirty policies...

Posted on October 4, 2011, in Political blog. Bookmark the permalink. Leave a comment.

اكتب تعليق

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: